Make your own free website on Tripod.com

Ta eksistí Arte Antiano (antilliaanse kunst).

 

No tin niun estudio sientífiko hasí, pa kual ta karakterisá arte Antiano.Kual ta e karakterístikanan di arte Antiano?

Nos por papia solamente di artista Antiano.

Tin kuater kategoria di arte:

q       Pintura (arte) di mucha (kindertekeningen)

q       Arte popular (volkskunst)

q       Arte naïf (naïeve kunst)

q       Arte amatùr (amateuristische schilderkunst)

q       Arte akadémiko ( professionele-academische kunst)

 

Den arte di mucha nos ta haña manera desaroyo motóriko, fase di desaroyo di elementonan manera kas, palu, bestia, outo ets.

 

Den arte popular nos ta mira diseño, figura, i tema for di pintura

di mucha, ambiente sosial i kultural, medio ambiente, bibienda di band’i kas ets.

 

Arte naïf ta un arte individual, ku ta salí for di e artista mes, i ta un produkto di su propio eksperensha personal i ambiente.

E artista ta saka su inspirashon dirèkt for di su bisindario / serkania, su soño, eksperensia òf rekuerdo.

E artista ta wak e tema ku e ta bai pinta na un forma habri, i no ta laga uso di koló òf espasio hunga un ròl den lokual e ta bai pinta.

Mayoria biaha e artista no ta hasi uso di Perspektiva i sombra den su pintura.

 

E artista no ta purba tampoko  pa pinta e realidat perfekto manera e ta, pero e ta trata na hinka su propio sentimentunan i emoshon den e pintura di moda ku ta surgi un diferensia entre e realidat i e pintura.

E artista no ta produsí obra sigun regla di un akademia di arte manera perspektiva, anatomia, konosementu di uso di koló, struktura di material, manera struktura di un palu òf piedra etc.

E artista ta selektá lokual ku e kier mira den su propio pintura, lokual ku e no ta haña interesante e ta laga keda afó.

 

Mayoria biaha bo ta keda rekonosé e forma di pinta di e artista.

Artista naïf ta traha pa su mes, no ta buska komunikashon, tampoko ta traha obra ku tin mensahe aden.

E artista ta opservá su tema i ta kuminsá traha su obra òf pinta  sin problema.

 

Kasi no ta posibel pa duna un definishon kiko ta arte naïf.

 

E puntonan menshoná ta pa solamente duna un kuadro  

di referensia kon pa mira arte naïf.

 

 

 

 

 

 

Den

 

Arte Amatùr bo ta haña ku pintor amatùr ta trata na

imitá  pintornan profeshonal mas tantu  ku ta posibel.

E kier ta versá, i ta imitá téknikanan for di e mundu di arte i artistanan 

profeshonal.

E kier igualá su mes ku artistanan profeshonal i ta usa nan figura,

diseño i tema.

 

Den Arte akadémiko e artista òf pintor profeshonal konosé e materia, i su ofishi.

E por mantené su mes na reglanan di un akademia i elaborá riba esaki.

Bo ta ripará na efekto (resultado) di su trabou si bo konosé e reglanan.

Tambe e artista por laga e reglanan aki para i bai over na eksperimentunan nobo.

E artista kontinuamente ta buskando, kreando i oumentando posibilidatnan nobo, i presentá su ekspreshon den su obra(nan).

 

Na Kòrsou nos tambe konosé tur e kuater kategorianan ku mi a menshoná. Bo no por bisa den kual di e kategorianan aki arte Antiano ta kai.

No ta na su lugá pa skohe un di e kategoria aki, i bisa ta esaki ta arte Antiano.

Papiando di arte Antiano, bo ta isolá bo artistanan lokal, i plak un etikèt riba su lomba ku bo no por kita fásil.

Mirando ku nos ta un pais den desaroyo, ta fásil pa e mundu pafó di nos deskribí nos arte bou di e kategoria di arte -naïf, -amatùr i –popular.

 

Miéntras tantu nos no tin nos propio akademia di Arte na nivel di un  akademia di arte, ku nos propio dosentenan salí for di nos propio akademia di arte, i ku nos ta produsiendo artistanan lokal for di nos propio akademia, nos por papia di Arte Antiano.

 

Nos papia aktualmente di Arte Antiano, ta bou di kua di e kuater Kategorianan aki riba, nos ta kualifiká ‘Arte antiano?

 

Arte ta universal, i e ambiente rondó di bo, kaminda bo ta práktika bo arte ta determiná bo produkto di arte. Pero no ta asina fásil pa bo kualifiká Artistanan Antiano bou di un kapa di ‘Arte Antiano.

E pensamentu aki ta drentando nos enseñansa na un forma infundá, ku ta bai bira un prekupashon pa nos tur ku ta Artista Antiano. Esaki ta konta pa tur sorto di arte, ku figura i apstrakto.

 

Si mi bai biba na China, segun tempu pasa mi no ta bai pinta kas di kunuku mas, pasombra mi a adaptá mi mes na lokual ku mi ta mira rondó di mi, mi ambiente i mi manera di pensa ta kambia, mi ta haña inspirashonnan di un bida kompletamente diferente.

Mi ta bira un Artista Antiano ku ta kai bou di Arte chines?

 

Tin biaha bo inspirashon ta bini di lokual bo a mira pa for di bo pais, lokual bo a mira na museonan, etc. Tin biaha bo no ta konsiente di unda e inspirashon ku bo a haña ta bini. Tin hopi faktor ku ta determiná e produkto ku bo a produsí, e vishon i inspirashon ku bo ta haña.

 

Tin biaha bo ta haña sierto inspirashon, i bo ta keda pega kuné, ku e por resultá bo bon òf malu. Un ehèmpel nos ta mira seka hopi kantante nan grandi, ku ta bini ku un hit, i bira konosí rònt mundu, i despues bo no ta tende nada mas di e artista.

Tin biaha e artista kier produsí un hit mas, pero e kier inspirá riba e kantika ku a bira hit promé, pero e kantika di dos ta bira un flòp, e no ta kai mas na smak di e públiko.

E artista mes no por komprondé esaki, i no ta konsiente ta di unda su inspirashon di e promé kantika ku a bira hit a sali.

 

Esaki ta pa ilustrá ku arte ta dinámiko, e ta keda desaroyá, tur biaha bo ta keda haña bo ku problema ku bo tin di solushoná, i ta esaki ta hasi bo produkto, bo arte interesante. Si no tin desaroyo, ta nifiká ku bo a keda pega un kaminda.

 

Tin kasonan ku e artista su produkto di arte kai na smak di e públiko, i e artista ta mira ku e ta haña un entrada pa su produkto, i pa e motibu aki e ta keda wantá sin desaroyá pa miedu di pèrdè e entrada aki. E artista ta krea su propio estilo, i ta lógiko ku e artista no ke kambio. Pero esei no ta motibu pa kualifiká su arte komo un Arte antiano.

 

Bo por haña tambe seka un artista ku tin mes un estilo, i no ta desaroyando, pasombra e no ke òf e no por sigui desaroyá.

E artista aki ta kopia (so) for di otro artista. E artista aki no ta tin òf no ta haña guia profeshonal. E artista no tin su propio estilo, i ta buskando tòg rekonosementu dor di kopia for di otro artista. E artista ta basa su mes riba un base komersial. E artista tambe kier ta konta, i ta hasi tur lokual ku ta na su alkanse pa e haña e rekonosementu ei. Tin biaha e artista ta biba ku hopi kompleho.

 

Artista ku miedu di otro.

 

Den nos komunidat Antiano, artistanan tin miedu di bisa otro ku e arte ku e ta práktika ta malu òf ku e ta bou di nivel.

Dor di krítika otro, artistanan ta stimulá otro pa logra un nivel mas haltu.

 

 

‘Nivel’ òf ‘inspirashon’

 

E pregunta ta awor nos ta skohe pa wak nivel (kalidat) òf pa inspirashon (kultural) di e artista.

Si bo ta opservá arte, bo por sali for di e punto di bista ku bo ta wak nivel (kalidat) òf  bo ta wak lokual ta inspirá e artista. Of tur dos.

 

Nivel

 

Ora bo ta papia di nivel (kalidat), bo ta papia di dominio i konosementu di material, uso di koló, aspekto(nan) manera lus, forma, espasio, komposishon, ku ta ser dominá dor di e artista. E artista ku konosementu di teorianan i istorianan di arte ( mayoria biaha Oropeo)

 

Inspirashon

 

Tambe bo ta wak e forma spontanio i ekspresivo di uso di e material, e mensahe den e obra, e inspirashon di e artista, e solushon ku el a buska pa loke e kier trese dilanti den su obra, su sintimentunan, lokual ku e kier splika e públiko, su filosofia, su pensamentu, su ilushonnan.

Su inspirashon, su kreatividat, su ekspreshon ku ta pone ku e ta usa e material di tal forma.

 

Dos tipo di nivel artista

 

Bo ta haña dos tipo di artista (plástiko).

1.     E artista ku a kuminsá práktika arte saliendo for di su propio inspirashon i eksperensha, ku nos ta yama outo-didáktiko.

Despues di tempu ku e artista sigui studia na akademia di arte e ta bira un  artista profeshonal.

2.     E artista ku a drenta un akademia arte pa motibu ku e ta gusta arte, pero ku nunka anterior a práktika arte pa un tempu promé (outo-didáktiko) ku el a bai studia.

 

E artista ‘unu’ a desaroyá su mes promé, i tin un sintimentu personal den su obranan ku e ta produsí.

E artista di dos mayoria biaha ta keda pega den reglanan akadémiko di arte (manera ta pará aki riba tokante nivel di arte). E artista aki tin biaha tin problema pa los for di reglanan akadémiko, i ta tuma hopi tempu pa e deskubrí su mes artístikamente. Mayoria biaha e artista aki no tin inspirashon personal, i ta buska rekonosementu solamente saliendo for nivel di arte, miéntras ku e kontenido di e arte no ta sobresalí kompletu.

 

Mi a skibi e artíkulo aki pasombra tin desaroyo nan nobo pa ku arte plástiko ku ta drentando nos enseñansa, sin ku nunka a bin un diskushon ta kon nos ta kalifiká nos Arte lokal, i ta kual ta e kriterionan ku bo ta usa ora bo ta papia di artistanan lokal antiano, te pa bo por papia di Arte Antiano.

 

E artíkulo aki ta puntonan di salida básiko ora bo kier kualifiká un artista di arte (plástiko) (antiano).

Den e kuadro aki, si bo kier identifiká arte antiano, bo mester bai wak e artista antiano.

 

Skibí pa

Rudsel Martinus,

 

Stichting FORSKA